======================================
參加者姓名:浪月(game名 =_=||)
文章主題:那次的相遇
文章內容:
『不論31536000秒,你就是我的唯一。那天遲到的偶遇,使我發現你的存在,每天上學也在注意你的出現,每次看到你的眼神,你的笑容,使我在繁忙的生活中加上一點的喜悅,不知不覺也許愛上你,但不知要對你說什麼,因為連你的名字也不清楚的我在你心目中也許只是路人甲。』
事情發生係3個月前既某天...
"拍拍拍!"...神早樓樓,邊個嘈生晒丫,阻住我訓覺。"阿仔起身啦!就遲到啦你!"我即時望下個鐘 7:10am
死火!遲左成半個鐘起身,唔知趕唔趕得切反學呢?唉~有理冇理,著左衫就閃。7:35 am 就出左門口。
到左小巴站,排長龍...我好心急咁排隊,左望又望,希望可以搵到d同學跟佢隊,唔...果個咪係朱西?乜原
來佢咁遲先反學架~去唔去跟...佢隔離果個女仔係???我一見到果個女仔,心情突然得到一種非筆墨能形容
既平靜,"我都係唔好去阻住人地啦,走去做電燈膽好似唔係太好。"沖沖忙忙就上車,反到學校好彩冇遲到。
第二日。"阿仔,尋日有冇遲到?"梗係冇啦,你阿仔我會唔會打破不遲到紀錄啊。"冇遲到就好啦,反正都冇
遲到,不如等埋媽咪先反學丫,我唔想排隊,想快小小反工司。"做仔既我當然會答應啦,跟我隊都冇咩所謂既
。又係7:35am 出門口 到左小巴站又見到果位朱西同學,又見到果位朱西同學既女朋友,今日我就有小小留意
佢,發現原來係F.3既女仔,個樣幾唔錯,中等身材,留長髮,不過我見到佢既眼神比我既印象好深刻,因為我係佢
眼神入面見到佢好孤獨,佢果種孤獨既眼神由我去到小巴站既一刻,望住我望到佢上車,我有小小心痛,因為果
位朱西同學出名係花心仔,一年換幾次女朋友,我為果位女仔感到悲哀。
重重複複既日子,你眼望我眼,我又望你幾眼咁,過左冇耐...發現朱西冇同佢起埋一齊排隊等小巴,佢一個
人係到排隊,唔通朱西病左?過左幾日如是,只不過估唔到佢地咁快就分左手,當然,自出娘胎到而家都未拍過拖
既我係唔會明白,我只好每日咁望住佢自己係到排隊...點解,點解我會咁留意佢架呢...點解每日7:35am出門口
唔係為左我阿媽,而係為左另一件事情咁既呢...我心情好複雜,但係每次見到佢既神眼,佢所發出既笑容...
就已經令我唔想再去諗,因為我就係鐘意佢,我希望可以守護佢。
自第一次係小巴站見到佢,我就不知不覺咁愛上佢,重未有著既感覺在我心中發出,我要每日都同一時間,風雨
不改咁係小巴站等佢出現。某日,因為某d事早左出門口,唔...排係前面果個,咪就係...!!好開心,今次係我第一
次咁接近佢,希望可以同佢坐埋同一班車啦...不過我見到佢係小巴站左望右望好似係到搵緊野咁,唔通佢有左新
男朋友?係到等緊佢?我好緊張,當佢望過黎後面果陣,救命...佢果種眼神殺左我啦...就黎升仙咁,不過我就鬆左
口氣,因為佢冇再左望右望,亦都冇男仔搵佢,太好啦!
到左學校,又要排隊,唉~每日都有既早會,好悶,搵左排後面既同學傾計...佢!!??原來佢係我隔離果班F.3既人
跟住我每日都特登搵d話題同後面果個傾計,嘗試偷聽下佢叫咩名,可惜,到現在我都未知到佢叫咩名。
某次午餐時間,為左等一位同學出去食飯而遲左出去,正係尼段時間,我又見到佢去左m記食飯,我即時叫埋果個
同學一齊去食,原來佢識我以前既一位同學,不過佢今年留班所以仲讀緊F.3,佢成日同佢d同學去m記食野,但係佢
果d同學入面有一個係"留班男"既女朋友,噢!原來搵佢唔難,只要見到果位"留班男"就可以見到佢。
到左近排學校搞左個運動會,我去左藍色社果到坐,上天對我真係好,原來果位女仔同佢d同學同埋果位"留班男"
都係藍色社,我坐左係最頂果到望著佢,我知道佢見到我坐係上面,每次佢另轉面同後面果個傾計,我都會"無意地"
望下佢,搞到我係果兩日運動會入面猶如魂魄與本體分隔,本體坐係最上面,魂魄坐係佢隔離...哇~好恐怖-_-||
當然~為左接近佢,我都一行行咁坐落去,一見到有同學坐係下一行就跳落去扮搵佢,但都因為咁,令到我參加左既
全部比賽都冇去。咁就完來運動會,乜都冇玩到...但係我就接近左佢好多。
有佢既存在,令到我平時更積極咁做下運動,為左接近佢,我心力交瘁,但係到而家,我都未知佢叫咩名...
究竟佢知唔知道我既存在...?
======================================
全部我自己打,真人真事(我自己既事)
[ 本帖最後由 167124357 於 2007-2-2 13:37 編輯 ] |
[複製鏈接]
發表於 2-2-2007 13:30:41